ကွင်းအတွင်း ပြေးဝင်ကာ ကွင်းလယ်ဒိုင် ဦးလှမင်းကို ရန်မူခဲ့သည့် ပရိသတ်ကို နေပြည်တော် နောက်ခံလူ ချစ်စမ်းမောင် ဖျောင်းဖျနေစဉ်
ကွင်းပေါ်ရှိ ပရိသတ်များက ခုံများကို ဤသို့ ကွင်းအတွင်း ပြစ်သွင်း ခဲ့ကြသည်
၂၀၁၃ မြန်မာနေရှင်နယ်လိဂ် ပြိုင်ပွဲကြီး၏ နောက်ဆုံး ပွဲစဉ်ဖြစ်သည့် နေပြည်တော် အသင်းနှင့် ရန်ကုန် ယူနိုက်တက် အသင်းတို့၏ ပွဲစဉ်မှာ နေပြည်တော် အသင်း အားပေးသူ ပရိသတ်များနှင့် နေပြည်တော် ကစားသမားများကြောင့် မလှမပ ဇာတ်သိမ်းခဲ့ရပြီ ဖြစ်သည်။ ပွဲမစမီ ကတည်းက ဖြစ်ပွားနေခဲ့သည့် ရုန်းရင်းဆန်ခတ် မှုများကို အချိန်မီ မထိန်းသိမ်းနိုင် ခဲ့သောကြောင့်လည်း ပွဲချိန် (၃၂)မိနစ်တွင် ရန်ကုန် အသင်း ပင်နယ်တီ ကန်ခွင့် ရခဲ့ချိန်မှ စ၍ ပြဿနာ ပိုမို ဆိုးရွားလာကာ ပရိသတ် အချို့အပါအ၀င် နှစ်ဘက် ကစားသမားများ ရန်ပွဲဖြစ်ပွားခဲ့ပြီး ပွဲကို ရပ်နားခဲ့ရခြင်း ဖြစ်သည်။
ညနေ (၆)နာရီတွင် စတင်မည့် ပွဲချိန်မတိုင်မီ ညနေ(၄း၃၀) နာရီခန့် နှစ်ဖက် ပရိသတ်များ ကွင်းအတွင်း ဆုံမိချိန်တွင် ပြဿနာများ စတင် အစပျိုးလာခဲ့ခြင်း ဖြစ်သည်။ ထိုအချိန်မှ စ၍ ပွဲမစမီ တစ်နာရီခွဲခန့် ကာလအတွင်း အရှေ့ဘက်တန်း ပွဲကြည့်စင်နှင့် အနောက်ဘက်တန်းရှိ အထူးတန်း ပွဲကြည့်စင်တို့မှ နေပြည်တော် ပရိသတ်များနှင့် တောင်ဘက်တန်း ပွဲကြည့်စင်တွင် နေရာချထားပေးသည့် ရန်ကုန် ယူနိုက်တက် ပရိသတ်များ အကြား အပြန်အလှန် အော်ဟစ်ဆဲဆိုမှုများ အပြင် နှစ်ဘက် ရေဗူးများနှင့် အပြန်အလှန် ပြစ်ခတ်မှု ဖြစ်ပေါ်ခဲ့သည်။ နောက်ပိုင်းတွင် နေပြည်တော် ပရိသတ်များ ဘက်မှ ကွင်းအတွင်း တပ်ဆင်ထားသည့် ထိုင်ခုံများကိုပင် ဖြုတ်ကာ ပြစ်ပေါက်ခဲ့သောကြောင့် တာဝန်ရှိသူများ တားဆီးခဲ့ရသည်။ အဆိုပါ ရန်ပွဲသည် ပွဲစတင်ချိန်တွင် ခေတ္တငြိမ်သက် သွားခဲ့သော်လည်း ပွဲချိန် (၃၂)မိနစ်တွင် ဒေးဗစ်ထန်အား နေပြည်တော် နောက်ခံလူများမှ ဖျက်ထုတ်ခဲ့သည့် အတွက် ရန်ကုန် ယူနိုက်တက်ကို ပင်နယ်တီ ကန်ခွင့် ပေးခဲ့ချိန်တွင် အရှိန်ပြင်းပြင်းနှင့် ပြန်လည် စတင်လာခဲ့သည်။ နေပြည်တော် ပရိသတ်တစ်ဦး ပွဲကြည့်စင်ပေါ်မှ ခုန်ဆင်းကာ ပင်နယ်တီ ကန်ခွင့်ပေးခဲ့သည့် ကွင်းလယ်ဒိုင် ဦးလှမင်းကို ရန်မူခဲ့သောကြောင့် တာဝန်ရှိသူများက အဆိုပါ ပရိသတ်ကို ထိန်းသိမ်းခဲ့သည်။ ထို့နောက် ဆီဇာက ပင်နယ်တီကို အပိုင်ကန်သွင်းကာ ရန်ကုန် အတွက် ဦးဆောင်ဂိုး ရယူပေးခဲ့ပြီး နောက်ပိုင်း ပွဲပြန်စချိန်တွင် နေပြည်တော် ကွင်းလယ်လူ ခိုင်ထူးက ရန်အောင်ကျော်ကို နောက်ကျောမှ ကွန်ဖူးကစ်ဖြင့် ကန်ခဲ့သောကြောင့် နှစ်ဘက် ကစားသမားများ ရန်ပွဲစတင် ဖြစ်ပွားကာ ပွဲကြည့်စင် အပေါ်မှ ပရိသတ် အချို့ပါ ကွင်းအတွင်း ခုန်ဆင်း ပါဝင်လာခဲ့ပြီးနောက် ၀ရုန်းသုန်းကား အခြေအနေဖြင့် ပွဲကို ရပ်စဲလိုက်ရခြင်း ဖြစ်သည်။ ကွင်းအတွင်း ကစားသမားများ ရန်ပွဲ ဖြစ်နေချိန်တွင် အထူးတန်း ပွဲကြည့်စင်ပေါ်ရှိ နေပြည်တော် ပရိသတ်များက ခုံများကို စိတ်ရှိလက်ရှိ ချိုးဖျက်ကာ ကွင်းအတွင်း ပြစ်သွင်းကြခြင်းဖြင့် ရန်ပွဲ အတွင်းသို့ အားတက်သရော ပါဝင်ခဲ့ကြသည်။
ကွင်းအတွင် ဖြစ်ပွားခဲ့သည့် ထိတ်လန့်ဖွယ်ရာ အဖြစ်အပျက်နှင့် ပတ်သက်၍ ရန်ကုန် ယူနိုက်တက် နည်းပြချုပ် အိုင်ဗန်ကိုလက်ဗ်က အလွန်စိတ်ပျက် ထိတ်လန့်ဖွယ် အတွေ့အကြုံပင်
ဖြစ်ကြောင်း ဆိုခဲ့ပြီး နေပြည်တော် ကစားသမားများ၏ ရန်လိုသည့် အပြုအမူများကို မေးခွန်းထုတ်ခဲ့သည်။ "ဒါမျိုး တစ်ခါမှ မကြုံဖူးပါဘူး။ တော်တော်လေး စိတ်ပျက်ဖို့ ကောင်းတဲ့
အတွေ့အကြုံပါ။ တော်တော်လည်း ကြောက်စရာ ကောင်းပါတယ်။ နေပြည်တော် ကစားသမားတွေ ဘာကြောင့်များ ဒီလောက် ရန်လိုနေရလဲ မသိဘူး။ ဒီတစ်ချက်ကို ကျွန်တော် နားမလည် နိုင်ဘူး"ဟု ကိုလက်ဗ်က ဖွင့်ဟပြောကြားခဲ့သည်။
အဆိုပါ ဖြစ်ရပ်များကြောင့် ပွဲအပြီးတွင် ကျင်းပရန် စီစဉ်ထားသည့် ဆုပေးပွဲ အခမ်းအနားကိုလည်း ဖျက်သိမ်းခဲ့ရရာ ယခုပွဲမှာ မြန်မာနေရှင်နယ်လိဂ် သမိုင်းတစ်လျှောက် အဆိုးရွားဆုံး ပွဲအဖြစ် မှတ်တမ်းဝင်ခဲ့ရသည်။ ထိုပွဲကို ရန်ကုန်မြို့မှ ရန်ကုန် ယူနိုက်တက် ပရိသတ် (၁၄၀၀)ခန့် လာရောက် ကြည့်ရှုခဲ့ရာ အဆိုပါ ပရိသတ်များနှင့် ကစားသမားများ၊ မီဒီယာများမှာ ကွင်းအတွင်း အတန်ကြာနေခဲ့ရသည်။ ပရိသတ်များနှင့် မီဒီယာများသည် ည(၉း၃၀)နာရီ ခန့်တွင်မှ ရဲယာဉ်တန်း အစောင့်အရှောက်များနှင့် ရန်ကုန်မြို့သို့ ပြန်လည် ထွက်ခွာခဲ့ရပြီး အ၀တ်လဲခန်း အတွင်း ပိတ်မိနေခဲ့သည့် ကစားသမားများမှာလည်း (၉း၃၀)နာရီ ကျော်မှ ဟိုတယ်သို့ ပြန်ခဲ့ရကြောင်း သိရသည်။
No comments:
Post a Comment